مبارح كنّا

بقلم بيرلا سمعان

مبارح كنّا

ولاد صغار

نمنا حلمنا

نصير كبار

لعبنا نسينا

ومرّ نهار

تعبنا غفينا

عَضَوّ قمار

وفجأة كبرنا

شو الّلي صار؟

زعلنا فرحنا

والقلب احتار

العمر سرقنا

من دون إنذار

من يوم لِخلقنا

الوقت غدّار

ولو فينا اخترنا

نعيد التكرار

صغار نضلنا

ويطول مشوار

بس هيدا قدرنا

نكون زوّار

عالدّني، وأملنا

نعيش أحرار

ما بيكسرنا

ولو كان جبّار

خوف ليالينا،

عالخوف ثوّار

بالحبّ سقينا

كومة أزهار

وهالدّنية حيينا

من تحت الدّمار

ولو بكرا فنينا

وصرنا غبار

وانمحت صوَرنا

منبقى شكّار

باقية أسامينا

عَحفاف الدّار

محفورة غنانينا

عالدرب تذكار…